29 de septiembre de 2011

Actos do Día Mundial das Aves 2011

Esta fin de semana comeza unha nova edición deste importante evento organizado por BirdLife International a escala mundial e que en España coordina SEO/BirdLife, para dar a coñecer o apaixonante mundo das aves e os seus problemas de conservación. Este ano desenvolveranse máis de 300 actividades en toda España, unha delas a que agora che presentamos, na que participa o noso Grupo de Anelamento ANDURIÑA.

Por OCTAVO ano consecutivo, o grupo de anelamento ANDURIÑA e máis a Sociedade Española de Ornitoloxía (SEO/BirdLife) convidan ao público en xeral a participar nos actos do “Día Mundial das Aves”. Repartirase entre os asistentes o libro editado polo noso grupo sobre o Espazo Natural de Punta Balea. A SEO facilitará material para repartir entre os participantes (pegatinas, posters, folletos informativos, etc.). Trátase dunha celebración moi especial que pretende festexar e difundir a rica variedade de aves que temos no noso país e en Punta Balea en particular.

Os actos serán esta fin de semana,

O sábado pola mañán, día 1 de outubro, haberá unha primeira convocatoria, para os comuneiros da Comunidade de Montes de Darbo, no monte Varalonga, onde se realizará anelamento de pequenas aves.

O domingo día 2 de outubro, desenvolverase o xa tradicional “Día das Aves” en Punta Balea (de 9:30 a 13:30), no tramo de costa comprendido entre a baleeira e a praia da Areamilla (cun punto de observación fixo nas inmediacións da lagoa).

A elección deste lugar non é fortuíta senón que se trata do mellor lugar da Península do Morrazo (e un dos mellores da provincia) para a observación das aves, tanto polo número de especies presentes (unhas 140 ó longo do ano) como polo achegamento que permiten.

Haberá varios postos de observación de aves nos que se poderán contemplar diversas aves acuáticas (na lagoa), mariñas (nas praias e mar) e terrestres (na costa).

Ao igual que en anos anteriores, nenos e maiores poderán seguir con todo detalle as explicacións (teóricas e prácticas) sobre as migracións e o estudio das aves mediante o seu anelamento (marcaxe con anelas).

Haberá telescopios a disposición do público, aínda que se recomenda que aqueles afeccionados que teñan prismáticos en casa veñan con eles.

Esperamos acadar o éxito de edicións anteriores, nas que participaron varios centos de persoas. Recoméndase a asistencia a primeiras horas, nas que as aves están máis activas (e sería máis doado observar un maior número de aves e especies) e, sobre todo, non deixalo para última hora do domingo, na que se produce a maior asistencia de público.

Os pasados anos observáronse, durante a actividade, unhas 30-40 especies de aves. Destas, preto de 15 especies foron capturadas e marcadas en presenza dos asistentes.

O acto ten unha dobre finalid

ade. Dunha banda poñer en coñecemento do público a grande diversidade de especies presente en Punta Balea e doutra reivindicativa de cara a conseguir a conservación deste espazo natural, situado en solo de protección de espazos naturais, sobre o que penduran diversas ameazas.

Os obxectivos xenerais do día das aves son:

Achegar o mundo das aves e os seus hábitats aos cidadáns animando á xente a unha maior participación e apoio na conservación da natureza.

Dar a coñecer as ameazas ás que se enfrontan as aves e as medidas de conservación necesarias para a súa supervivencia.

Concienciar á opinión pública sobre a importancia de conservar o noso entorno natural máis próximo, como un primeiro paso para avanzar na conservación medioambiental do noso planeta.

A proposta deste ano é NACERON PARA VOAR LIBRES, contra “A CAZA ILEGAL DE AVES MIGRADORAS”, xa que máis de catro millóns destas aves morren ao ano en España, especialmente na rexión Mediterránea, a pesares das prohibicións das leis españolas e europeas.

No Día Mundial das Aves de 2010 se celebraron en España 161 actos (grazas ao esforzo duns 1.000 voluntarios e 174 entidades colaboradoras), nos que participaron máis de 40.000 persoas, resultando ser, como en anos anteriores, un dos países con maior índice de participación.